मी राजकारणात आहे ह्याचा मला अभिमान आहे!

मी राजकारणात आहे ह्याचा मला अभिमान आहे!

‘बदल होईल’ असं आपल्यातल्या फारच थोड्या लोकांना वाटतं. 

खूपशा लोकांना वाटतं, जे चाललंय तसंच चालणार. फारसा बदल होणार नाही. त्यामुळे होता होईल तेव्हढी मजा करावी, हिंडावं फिरावं, खावं प्यावं. फारसा काही विचार करू नये. विचार करून तरी काय उपयोग?

काहींना वाटतं, ‘बदल होणार नाही’, कारण लोक बिघडलेत. मी चांगला आहे पण लोक वाईट आहेत. राजकारणी वाईट. पोलीस वाईट. शेजारी वाईट. नशीब वाईट. कोणी ना कोणी वाईट, म्हणून बदल होणार नाही. 

‘बदल होईल‘ पण तो खूप अवघड आहे, गुंतागुंतीचा आहे, आपल्या जन्मात तरी तो शक्य नाही. मात्र कुठेतरी तो होईल आणि मग तो कसा असेल, कसा होईल, केंव्हा होईल, कुठे होईल ह्याचा काथ्याकूट करणारे काही असतात. ही मंडळी चर्चा खूप करतात. पण फक्त चर्चाच करतात. 

काही असतात, जे बदल घडवण्याची अवघड लढाई लढत असतात.

राजकारण ही अशी अवघड लढाई आहे.      

मोठमोठी स्वप्न देणं हे राजकारण्यांचं एक काम असतं. म्हणजे “भारत एक महासत्ता बनवू”, “गरीबी हटाव!” वगैरे वगैरे. हे फारसं अवघड नाही, पण तरीही चांगली, लोकांना पटेल अशी स्वप्न देणं कुणालाही जमतं असं नाही. 

दुसरी गोष्ट अधिक अवघड आहे. 
लोकांना बरोबर घेणं, खूप लोकांना जोडणं, त्यांच्याशी बोलत रहाणं, जमवून घेणं. त्यांना एकत्र काम करायला लावणं, प्रोत्साहन देणं. कधी आपल्या तत्वांना मुरड घालणं, पटत नसलं तरी सोबत रहाणं. लोकांच्या शिव्या खाणं. बदनामी चा धोका पत्करणं.... अश्या कित्येक अवघड गोष्टी. 

त्याच्या पुढचं आणखी अवघड.
एव्हढं सगळं सांभाळून मग लोकांच्या जगण्यात निश्चित, शाश्वत असा बदल करणं. त्यासाठी समाजाला मोठ्या बदलासाठी तयार करणं आणि तसा बदल घडला की मग तो लांब काळासाठी टिकवून ठेवणं.

राजकारण म्हणूनच अवघड लढाई आहे. 

सहज सोपी नाही, पण ती तशी आहे म्हणूनच लोक राजकारणाला नावं ठेवतात आणि त्यात न पडण्याला कारणं शोधतात. स्वत: जे करू शकत नाही तसा अवघड बदल घडवू शकणारा एखादा नेता मात्र त्यांना विलक्षण आवडतो, अश्या राजकारण्याच्या मागे मागे मग लोक धावतात. अर्थात असं असलं तरीही राजकारण हे त्यांच्या लेखी वाईट ते वाईटच. फक्त गप्पा मारायला आणि टीका करायला त्याचा उपयोग. 

आज हे लिहिण्याचं कारण म्हणजे स्टीव्हन स्पीलबर्ग ह्यांचा - मात्र अजून भारतात प्रदर्शित न झालेला - नवा चित्रपट: ‘लिंकन’. 

अमेरिकेत हा चित्रपट प्रदर्शित झाला आणि त्यावरचं एक परिक्षण वाचनात आलं. लिंकन एक थोर राजकारणी माणूस, पण अमेरिकेला वंशभेदापासून लांब ठेवता ठेवता तो देश एकसंधही रहावा म्हणून त्यानं काय काय सहन केलं आणि तो कुठल्या कुठल्या अग्निदिव्यातून गेला ह्याचं चित्रण म्हणे ह्या चित्रपटात आहे. 

ते असो वा नसो.

मी राजकारणात आहे आणि मला मी राजकारणी असण्याचा का अभिमान आहे हे मला त्यातनं भावलं म्हणून हे लिहिलं.

अनिल शिदोरे